شهر رمضان مبارك طيب كريم!

أفضل وأجمل وأبهى أشهر السنة! أتمنى أن يعيده الله علينا جميعاً بالأمن والأمان والعفو والمغفرة والجد والعمل

بالعودة لمنشوراتي الإسبوعية، هاد هوي الإسبوع الثالث. المفترض إنو يكون ثيم هذا الإسبوع هو عن القراءة ولكن لتعسر الوقت لح يكون للإسبوع القادم. ما بدي استعجل بكتابة بوست لح يكون غريب ومالو اعتيادي من هالشكل. وبالتالي لح يكون ثيم هذا الإسبوع هو سلطة (أو بوظة متل ما بتحب!)

شو عم إقرأ حالياً

• Things Hidden Since the Foundation of The World للكاتب الفرنسي رينيه جيراد. كتاب فيلسوفي قح رائع لدرجة الغرابة. بيتكلم بشكل أساسي عن شي اسمو Mimetic behaviour أو السلوك المحاكي | المقلّد. قريتو بعد تزكية كبيرة من  Peter Thiel.
• بوست Contrarian Strategy | الاستراتيجية المضادة مرة تانية لأفكار Peter Thiel من الـ Paypal Mafia ومؤلف كتاب Zero to One.  بيتر وأفكاروا يمكن من أكتر الأفكار يلي أثرت عليي بالسنتين الماضيين من ناحية شغلي لقدام ع Startup / Business. هاد بوست بيحكي عن بعض الأفكار إلو. رائع بحق. وإذا عندك ٢-٣ ساعات فيك تقرا كتاب Zero to One لأنو كتاب بيخليك تفكر بطريقة مختلفة عن الـ Startups/ Business. هاد دائماً بيكون من أول الكتب يلي بقولها لأصدقائي وقت حدا بيسألني عن كتب للـ Startup/ Business.

اقتباس عم طبقوا | فكّر فيه

“It’s not about you.” فكّر فيها قليلاً. بضل بفكّر بهي المقولة. عميقة جداً من إنو حياتنا هيي مو بس إلنا. ومو بس مشان نعمل الشي يلي نحنا بدنا ياه.

قيد عم إتحدى نفسي فيه

ضل مداوم ع رياضة كل يوم من الإسبوع. صرلي تقريباً فترة ال٣ السنين الماضية بشكل شبه منتظم. هلق عم حاول يكون دائماً بيومي فيه رياضة لو شو ما صار وشو ما كان يومي. شهر رمضان مبارك مالو حجة أبداً للقطع. في رياضة مساء بعد الفطور فيك تعملها أو بالبيت أو يوغا أو أو. في Apps عن هالشي بحكي عنون بإسبوع قادم.

شيء انبهرت فيه

Webstorm إذا كنت مطور ويب فبجد Webstorm (وخصوصاً للـ JS جيد جداً) بالعادة بشتغل ع PyCharm بس للـ JS الـ Webstorm جربتو كتير جيد. مالو مجاني. لهلق لساتني نسخة تجريبية عليه (هل حدا عندو رأي آخر ع IDE أفضل أو مجاني؟)

شيء جديد عم جربه

Freedom App مالح إحكي عنو أكتر لحتى يطلع معي رأي مناسب. أول شي كتير كرهت طريقتو. بس هلق رد عجبني. هو تطبيق بيمنع Block Lists إنت بتحددون وبالتالي مثلاً فيك تقلّوا مناع الـ Social Media Websites لمدة ٤ ساعات. ما فيك تغير. متاح للابتوب وللموبايل. مدفوع. بظن في بدائل. في تطبيق مستخدمو من قبل عالويندوز مالي متذكروا (إذا بتعرف متل هيك تطبيق شاركني 🙂 )

شيء ندمت إنو جربته 😂

كان لازمني نظارات شمسية. استراتيجتي الحالية بالشراء: يا اشتري غالي كتير منيح يا أما لا تشتري أبداً. يعني لا تشتري رخيص وبعدين تكب. لا تشتري نص نص. اشتري شغلة منيحة وقيمها من بالك.

مشان عدم تضويع وقتك أكثر، المهم، فتت ع محل Primark ولقيت نظارات بـ ٢ يورو. سعرون بجد كتير غريب. اشتريتون بشكل معاكس للاستراتيجية المتبعة 😒 ما بعرف ليش. المهم طلعوا بيخلوك تشوف الدنيا متل عصر التمانينات وكلو ع أصفر. ما بعرف إذا هي Feature لما Bug 😂.

بصراحة إجتني أفكار شو إعمل فيون لح تشوفوها إذا طبقتا.

شو عم إسمع

عم عيد كتير سورة الرعد للشيخ عبد الباسط عبد الصمد بالفترة الماضية. شخص بصوت غير عادي وبنفس غير عادي. النفس يلي بيقدر ياخدوا رائع. جرّب طريقة تجويده و”شوف|اتنفس” بنفسك.

أحسن شي شفتو

• الحلقة الثانية من قمرة 2. حلقة عن إيواء المشردين ونظرتنا للمشردين وشو ممكن تكون حياة المشردين قبل التشرد ونحنا بس عم ننظر للحالة الحالية إلون. قصة حقيقة بتمس المشاعر.
• تيد توك عن “ماذا تعلمنا من ٥ مليون كتاب؟” رائع بحق لغوغل بيحكي عن شو الاستنتاجات يلي فيك تعملها إذا كان في عندك ذكاء AI بيقدر يقرا ٥ مليون كتاب. رائع.

عشو عم حط وقتي

مشروع X يلي مافيني قولوا ليطلع. عم ياخد كل أسابيعي.

أكتر بوست محبوب عالإنستغرام

بوست ساعتي! “هي الساعة صرلها معي ٩ سنين.” وبوست البوظة! “لا أعرف من أين أبداً”

إن شاء الله تكون هي النسخة مفيدة وسريعة ولزيزة وعجبتك!

صياماً مقبولاً وفطوراً خفيفاً (مشان تلعب رياضة) وسحوراً شهياً وإيماناً عميقاً

أراكم الأسبوع القادم من شهر رمضان المبارك!